Zəngəzurda TRIPP layihəsinin gedişatını müəyyənləşdirmək məqsədilə oktyabrın 21-də Ermənistanın baş nazirinin müavini Mqer Qriqoryanın rəhbərlik etdiyi nümayəndə heyəti Sünik vilayətinə səfər edib. Ermənistan rəsmiləri tikintiyə 2027-ci ilin əvvəlində başlanmasını daha real hesab edirlər.
Bəs Ermənistan hansı hazırlıqları görür, nəyi dəqiqləşdirməyə çalışır?
Mövzu ilə bağlı Baku TV-yə açıqlamasında siyasi şərhçi Oqtay Qasımov bildirib ki, layihə çərçivəsində dəmir yolu, avtomobil yolu və enerji infrastrukturu üzrə işlər nəzərdə tutulur. Hazırda bu istiqamətlər üzrə layihələndirmə işlərinə hazırlıq görülür. Ermənistan tərəfi layihəni həyata keçirəcək şirkətin yaradılması ilə bağlı da yekun mərhələyə yaxınlaşdığını açıqlayıb.
Ekspert hesab edir ki, tikintinin gecikməsində hüquqi və təşkilati prosedurların uzanması mühüm rol oynayır. ABŞ ilə əldə olunmuş razılaşmanın Ermənistan parlamentində ratifikasiyası da qarşıda duran məsələlərdəndir.
Şərhçi İranın mövqeyinin də prosesə təsir göstərə biləcəyini bildirib. Onun sözlərinə görə, Tehran uzun müddət Zəngəzur istiqamətində nəqliyyat kommunikasiyalarının açılması ilə bağlı narahatlığını ifadə edib.
