Güclü küləyin təsiri nəticəsində daha bir nəfər - 2021-ci il təvəllüdlü azyaşlı (kişi cinsli) Səhiyyə Nazirliyinin Elmi-Tədqiqat Travmatologiya və Ortopediya İnstitutuna hospitalizasiya olunub.
Oxu.Az xəbər verir ki, bu barədə Səhiyyə Nazirliyindən məlumat verilib.
Bildirilib ki, aparılan müayinələr nəticəsində pasiyentə sağ əlin ikinci barmağının əzilmiş-cırılmış yarası diaqnozu qoyulub. Xəstəyə rentgen müayinəsi edilib, aseptik sarğı və gips langet qoyulub:
"Pasiyentin vəziyyəti qənaətbəxş qiymətləndirildiyindən ambulator müalicə üçün evə buraxılıb. Ona ev şəraitində müalicə və tibbi nəzarətlə bağlı müvafiq tövsiyələr verilib".
Bakıda iyulun 27-də güclü külək nəticəsində dörd nəfər (iki kişi, iki qadın) xəsarət alıb.
Bu barədə Oxu.Az-a Tibbi Ərazi Bölmələrini İdarəetmə Birliyindən (TƏBİB) məlumat verilib.
İki nəfər (bir qadın, bir kişi) Kliniki Tibbi Mərkəzə (KTM) hospitalizasiya olunub. Onlardan bir kişinin müalicəsi KTM-in Neyrocərrahiyyə şöbəsində davam etdirilir, vəziyyəti stabil qiymətləndirilir.
Bir qadına isə zəruri tibbi xidmətlər göstərilib, vəziyyəti qənaətbəxş qiymətləndirildiyindən ambulator müalicə üçün evə buraxılıb.
Daha iki nəfər isə Səhiyyə Nazirliyinin tabeliyində olan Elmi-Tədqiqat Travmatologiya və Ortopediya İnstitutuna hospitalizasiya olunub.
Əlverişsiz hava şəraiti ilə əlaqədar iyulun 27-də Respublika Təcili və Təxirəsalınmaz Tibbi Yardım Mərkəzinə Bakı şəhəri üzrə iki çağırış daxil olub.
Bu barədə Oxu.Az-ın sorğusuna cavab olaraq Tibbi Ərazi Bölmələrini İdarəetmə Birliyindən (TƏBİB) məlumat verilib.
Məlumata görə, çağırış ünvanlarına təcili tibbi yardım briqadaları cəlb olunub.
Bildirilib ki, saat 07:55-də Səbail rayonu, Xəqani küçəsi ərazisindən daxil olan çağırış zamanı bir qadın Kliniki Tibbi Mərkəzə hospitalizasiya edilib:
"Həmçinin saat 10:25-də Nizami rayonu, Atletlər kəndi ərazisindən qeydə alınan çağırış zamanı bir kişi Elmi-Tədqiqat Travmatologiya və Ortopediya İnstitutuna hospitalizasiya olunub".
