Azərbaycanda meşə ilə örtülü ərazilərin sahəsi 2025-ci ilin sonuna 1 milyon 42.1 min hektara çatıb.
Oxu.Az xəbər verir ki, bu barədə məlumat Dövlət Statistika Komitəsinin statistik göstəricilərində yer alıb.
Rəsmi rəqəmlərə əsasən, ölkənin ümumi ərazisi 8 milyon 660 min hektar təşkil edir. Meşə ilə örtülü sahələrin ölkə ərazisində payı isə 12 faizdir.
2021-2023-cü illərdə meşə ilə örtülü ərazilərin sahəsi 1 milyon 40.7 min hektar olub. 2024-cü ildə bu göstərici 1 milyon 42.1 min hektara yüksəlib və 2025-ci ildə də eyni səviyyədə qalıb.
Ölkənin ümumi quru ərazisi 2025-ci ilin sonuna 8 milyon 264.9 min hektar təşkil edib.
Statistik məlumatlarda Azərbaycanın ümumi ağac ehtiyatının 2025-ci ildə 107.4 milyon kubmetr olduğu göstərilir. Müqayisə üçün qeyd edək ki, 2021-ci ildə bu göstərici 143.7 milyon kubmetr, 2022-ci ildə 103.7 milyon kubmetr, 2023-cü ildə 105 milyon kubmetr, 2024-cü ildə isə 106.3 milyon kubmetr olub.
2025-ci ildə Azərbaycanda meşə təsərrüfatı işlərinin dəyəri 21 milyon 872,4 min manat təşkil edib.
Statistik göstəricilərə görə, 2024-cü ildə bu sahədə görülən işlərin dəyəri 19 milyon 24.2 min manat olub. Beləliklə, 2025-ci ildə əvvəlki illə müqayisədə meşə təsərrüfatı işlərinin dəyəri 2 milyon 8480.2 min manat və ya təxminən 15 faiz artıb.
2023-cü ildə meşə təsərrüfatı işlərinin dəyəri 17 milyon 661.7 min manat, 2022-ci ildə 239 milyon 110 min manat, 2021-ci ildə isə 14 milyon 340 min manat təşkil edib.
Qeyd edək ki, statistik cədvəldə 2003-cü il üçün bu göstərici 367.7 min manat göstərilib.
