Şamoyev Firudin İsa oğlu 1962-ci il 7 fevralda Qazax rayonunda anadan olub. Orta təhsilini doğma rayonlarında alıb, 1981-ci ildə Həqiqi hərbi Xidmətə çağırılıb, 1983-cü ildə Ordudan tərxis olunaraq Qazaxa qayıdıb. Təmir Tikinti İdarəsində çilingər işləyib.
Oxu.Az xəbər verir ki, Firudin Şamoyev 1991-ci il 8 iyul tarixində könüllülərdən ibarət dəstəyə yazılıraq cəbhəyə yollanıb. 707 saylı hərbi hissədə minaatan bölüyün komandiri vəzifəsinə təyin olunub.
Qazax rayonunun Bağanıs Ayrım, Məzəm, Quşçu Ayrım və digər kəndlərinin müdafiəsində xüsusi qəhrəmanlıq nümayiş etdirib.
1992-ci il 13 apreldə Quşçu Ayrım kəndi ətrafında gedən ağır döyüşdə F.Şamoyev qəhrəmancasına həlak olub.
Ailəli idi. Üç övladı yadigar qalıb.
Qazax rayonunun Şəhidlər xiyabanında dəfn edilib.
Qazax şəhərindəki orta məktəblərdən biri qəhrəmanın adını daşıyır.
