Şəkidə güclü külək irigövdəli ağacları və dirəkləri aşırtdı

Şəkidə gecədən başlayan güclü külək və yağışla müşayiət olunan hava şəraiti səhər saatlarına kimi hökm sürüb.

Oxu.Az-ın məlumatına görə, şəhərin İzzət Həmidov və Rasim Ocaqov küçələrində irigövdəli ağac və rabitə dirəyi aşıb.

Bir sıra yollarda asfalt örtük dağılıb.

Şəkidə güclü külək irigövdəli ağacları və dirəkləri aşırtdı

Şəki şəhər İcra hakimiyyətindən bildirilib ki, sel suları Şəkinin Oxud, Baş Göynük, Baş Layısqı, Baş Şabalıd, İnçə, Zunud, Aşağı Şabalıd, Bideyiz kəndlərində fəsadlar törədib, yollar dağılıb.

Əzizə İsmayılova

10:38

İsmayıllının bir neçə kəndinə güclü dolu yağıb.

Oxu.Az-ın məlumatına görə, bu gün səhər saatlarında İsmayıllı rayonunda güclü dolu və leysandan sonra əmələ gələn sel suları ciddi fəsadlar törədib.

Dağlıq ərazidə yerləşən Əhən Dvoryan və Qoydan kəndlərinə güclü dolu düşüb, meyvə bağlarına, əkin sahələrinə ciddi ziyan dəyib.

Gecədən səhərədək yağan güclü leysan səbəbindən əmələ gələn sel suları evlərə, hasarlara ziyan vurub, kəndlərin yollarını dağıdıb, Qoydan kəndinin rayon mərkəzi ilə nəqliyyat əlaqəsi kəsilib. Hazırda yağışlı hava şəraiti davam edir.

Qeyd edək ki, ötən gün Qoydan kəndində torpaq sürüşməsi ilə əlaqədar bəzi sakinlərin kəndi tərk etməsi ilə bağlı məlumat vermişdik.

Yaranan vəziyyətlə bağlı Qoydan kəndində olan qadınların və uşaqların kənddən çıxarıldığı və bir neçə sakinin əşyalarını çıxartmaq üçün kənd ərazisində olduğu bildirilir.

Əzizə İsmayılova

10:00

Səhər saatlarında fəsadlar törədən leysan yağışları Qəbələ rayonunun kəndlərində də fəsadlar törədib.

APA-nin Şirvan bürosu xəbər verir ki, tufan və leysan nəticəsində rayonun Vəndam, Yengicə Nohurqışlaq, Bunud, Həzrə kəndlərində də problemlər yaranıb.

Bostan və şəxsi təsərrüfatlara ciddi ziyan dəyib.

08:58

Səhər saatlarından başlayaraq güclü leysan yağışları Qəbələdə fəsadlar törədib.

APA xəbər verir ki, küləklə müşayiət olunan leysan yağışları nəticəsində bir çox küçələri sel suları dağıdıb, ağaclar aşıb, hələ də rayonda elektrik enerjisinin verilməsində fasilələr yaranıb.

Qəbələ Şəki avtomobil yolunda külək nəticəsində bir çox ağac aşaraq yolun müvəqqəti bağlamasına səbəb olub.

Hazırda ərazidə işlər aparılır.