Qızılcaya yoluxan zaman peyvəndlənmə mümkündürmü?

“Qızılcaya əvvəllər yoluxmayan və peyvəndlənməyən şəxslər xəstəlik aşkarlandığı 72 saat ərzində peyvəndlənə bilərlər”.

Oxu.Az xəbər verir ki, bu sözləri Tibbi Ərazi Bölmələrini İdarəetmə Birliyinin (TƏBİB) Tibbi Xidmətlərin İnkişafı Departamentinin Yoluxucu Xəstəliklər və İnfeksion Nəzarətin Təşkili Şöbəsinin baş məsləhətçisi Turan İbrahimova deyib.

Turan İbrahimova qeyd edib ki, qızılcaya qarşı peyvəndin iki dozası vurulur:

“Xatırlatmaq istəyirəm ki, qızılcaya qarşı peyvəndin birinci dozası uşaq 12 aylıq olanda, digəri altı yaşında vurulmalıdır. İki doza vurulan şəxslərin yenidən peyvəndlənməsinə ehtiyac yoxdur. Əgər şəxs qızılcaya yoluxmayıbsa və ya peyvəndlənməyibsə, 72 saat ərzində peyvəndlənə bilərlər. O zaman xəstəliyi daha yüngül keçirəcək”.

T.İbrahimova sonda TƏBİB-in xəstəliyə qarşı aktiv olduğunu əlavə edib:

“Bakıda 17, Sumqayıtda iki, regionlarımızda 48 şöbəmiz mövcuddur. Ümumilikdə 1 400 çarpayımız var”.

Nəzrin Vahid