:1200.jpg)
“Bir hissəsi iki ölkə sərhədi boyunca axan Samur çayının tədqiqi üçün Rusiya alimlərinin Azərbaycana ilk ekspedisiyası 2023-cü ilin dekabrında baş tutacaq”.
Bu barədə TASS-a Azərbaycan Milli Hidrometeorologiya Xidmətinin rəis müavini Rafiq Verdiyev bildirib.
Onun sözlərinə görə, layihə su ehtiyatlarının qorunması və iqlim dəyişikliyi ilə mübarizə üçün vacibdir:
“Bu çayın su ehtiyatlarının qorunması bizim üçün mühüm amildir. Rusiya alimlərinin Azərbaycana ekspedisiyası gözlənilir. Hövzələrin biomüxtəlifliyi, su ehtiyatları, yeraltı suların səth sularında dəyişikliklər baxımından birgə tədqiqatlar aparılacaq. Buna əsaslanaraq, layihə təkliflərini daha ətraflı şəkildə formalaşdıracağıq. Layihə iqlim dəyişikliyinə uyğunlaşma sahəsində, eləcə də atmosferə istixana qazlarının tullantılarını azaltmaq üçün vacibdir”.
R.Verdiyev əlavə edib ki, alimlər Samur çayı hövzəsində əvvəllər belə ətraflı ekspedisiyalar aparmayıblar:
“Birgə tədqiqatlar təkcə Azərbaycan ərazisində deyil, həm də Rusiya ərazisində, Dağıstanda aparılacaq. Son 20-30 ildə iqlim dəyişikliyi su təchizatı və kənd təsərrüfatının inkişafı şəraitinin əhəmiyyətli dərəcədə pisləşməsinə, Xəzər dənizinin səviyyəsinin aşağı düşməsinə, quraqlığa, səhralaşmaya səbəb olub ki, bu da ölkələrin iqtisadiyyatına və insanların həyatına mənfi təsir göstərir.
İqlim dəyişikliyi ilə mübarizə üçün biz Rusiya ilə bir sıra layihələr planlaşdırırıq. Onların əsas məqsədləri meşələrin, bitki örtüyünün salınması, sahil mühafizə zonasının möhkəmləndirilməsi, eroziya və səhralaşma ilə mübarizə yolu ilə su ekosistemlərini, eləcə də hövzənin biomüxtəlifliyini qorumaqdır. Bütün bu fəaliyyətlər hövzənin iqlim dəyişikliyinə davamlılığına və su ehtiyatlarının qorunmasına səbəb olacaq”.
