Sabirabadda dəhşətli qəzada üç nəfər öldü: Xəsarət alanların son durumu AÇIQLANDI

Sabirabad rayon Minbaşı ərazisində baş verən yol-nəqliyyat hadisəsi zamanı xəsarət alanların vəziyyəti məlum olub.

Bununla bağlı Oxu.Az-ın sorğusuna cavab olaraq Tibbi Ərazi Bölmələrini İdarəetmə Birliyindən (TƏBİB) məlumat verilib.

Qeyd olunub ki, 27 noyabr tarixində yol-nəqliyyat hadisəsində xəsarət alan dörd nəfər Şirvan Şəhər Mərkəzi Xəstəxanasına hospitalizasiya olunub.

"Onlardan 1986-cı il təvəllüdlü (kişi cinsli) şəxsə sol bud sümüyünün sınığı, sol bazunun sınığı, 2011-ci il təvəllüdlü (cinsi qadın) şəxsə hər iki bud sümüyünün sınığı, 2017-ci il təvəllüdlü (kişi cinsli) şəxsə isə qapalı kəllə beyin travması, daxili qanaxma, travmatik şok diaqnozu təyin edilib.

İki nəfərin müalicəsi Anesteziologiya reanimasiya və intensiv terapiya şöbəsində davam etdirilir, 2017-ci il təvəllüdlü şəxs isə hazırda əməliyyat olunur. Həkimlərin səyinə baxmayaraq 1992-ci il təvəllüdlü (cinsi kişi) şəxsin həyatını xilas etmək olmayıb", - deyə məlumatda bildirilir.

Oxu.Az-ın əldə etdiyi məlumata görə hadisə nəticəsində "Daewoo" markalı avtomobildə xəsarət alan azyaşlılar 2015-ci il təvəllüdlü Əli Samir oğlu Umudov və 2016-cı il təvəllüdlü Nuray Samir qızı Umudovadır. Digər xəsarət alan isə Sakit Rəvan oğlu Hüseynovdur.

"Toyota" markalı avtomobilin sürücüsü Salatın Rəhman qızı Abuzərova isə müəllimədir və o, işə gedirmiş.

Sabirabadda dəhşətli qəzada üç nəfər öldü: Xəsarət alanların son durumu AÇIQLANDI

09:52

Sabirabad rayonunun Qaraağac kəndi ərazisində baş verən yol-nəqliyyat hadisəsi nəticəsində üç nəfər həyatını itirib.

Bu məlumatı Baş Dövlət Yol Polisi İdarəsinin (BDYPİ) rəsmisi, polis polkovnik-leytenantı Mübariz Ağayev Oxu.Az-a açıqlamasında bildirib.

"Hadisə bu gün saat 08:00-da qeydə alınıb. Hadisə Sabirabad rayon sakinləri Samir Qurbanəli oğlu Umudovun idarə etdiyi "Daewoo" markalı, 90-MY-798 dövlət qeydiyyat nişanlı və Salatın Rəhman qızı Abuzərovanın idarə etdiyi "Toyota" markalı, 90-KU-752 dövlət qeydiyyat nişanlı avtomobillərin toqquşması nəticəsində baş verib.

Qəza nəticəsində qadın sürücü, eləcə də "Daewoo" markalı avtomobildə olan sərnişin 1971-ci il təvəllüdlü Hacıyev Manaf Poladxan oğlu hadisə yerində, sürücü - Samir Umudov isə xəstəxanada həyatlarını itiriblər.

"Daewoo" markalı avtomobildə olan Sakit Rəvan oğlu Hüseynov və iki azyaşlı isə Şirvan Şəhər Mərkəzi Xəstəxanasına yerləşdirilib. Faktla bağlı araşdırma aparılır", - deyə məlumatda bildirilir.

Əzizə İsmayılova

09:32

Sabirabadda baş verən yol-nəqliyyat hadisəsi zamanı üç nəfər ölüb.

"Report"un Aran bürosunun məlumatına görə, bu gün səhər saatlarında rayonun Qarağac kəndi ərazisində baş verən yol-nəqliyyat hadisəsi zamanı Sabirabad sakinləri - Samir Qurbanqulu oğlu Umudov, Manaf Poladxan oğlu Hacıyev və Şirvan şəhər sakini Salatın Rəhman qızı Abizərova ölüblər.

Hadisə nəticəsində xəsarət alan iki nəfər isə Şirvan Şəhər Mərkəzi Xəstəxanasına yerləşdirilib.

Faktla bağlı araşdırma aparılır.

08:43

Sabirabad rayonunda ağır yol-nəqliyyat hadisəsi baş verib.

"Report"un Aran bürosunun məlumatına görə, hadisə bu gün səhər saatlarında rayonun Qarağac kəndi ərazisində qeydə alınıb.

İlkin məlumata görə, dəmir yolu keçidinin yaxınlığında iki avtomobil toqquşub.

Qəzada müxtəlif dərəcəli xəsarət alan beş nəfər Şirvan Şəhər Mərkəzi Xəstəxanasına çatdırılıb.

Hazırda yaralıların şəxsiyyəti dəqiqləşdirilir.

Faktla bağlı araşdırma aparılır.