Şahin Mustafayev: "Türkiyədə Orxun Proqramından yararlananların nisbəti olduqca aşağıdır"

"Apardığımız araşdırma nəticəsində türk dövlətlərində professor-müəllim heyəti və tələbələr arasında Orxun Mübadilə Proqramı haqqında son dərəcə az adamın xəbərdar olduğu ortaya çıxdı. Belə ki, bu proqramın istifadəçilərinin ən yüksək göstəricisinin Azərbaycanda olmasına baxmayaraq (9.49%), respondentlərin əksəriyyəti (44.69%) bu proqramdan ümumiyyətlə məlumatsızdır".

Oxu.Az xəbər verir ki, bunu Türk Akademiyası və Sosial Tədqiqatlar Mərkəzinin (STM) birgə təşkilatçılığı ilə keçirilən "Türk barometri 2024" - Türk dövlətlərində təhsil və elm sahəsində əməkdaşlıq: Mövcud reallıqlar və gələcəyə baxış" mövzusunda keçirilən beynəlxalq konfransda Türk Akademiyasının prezidenti Şahin Mustafayev deyib.

O bildirib ki, Türkiyədə də Orxun Proqramından yararlananların nisbəti olduqca aşağıdır (1.87%):

"Bundan əlavə, bütün ölkələrdən olan iştirakçıların əksəriyyəti proqramdan yararlanmayıb. Və ya rəyi soruşulanların 51.44%-nin, yəni yarıdan çoxunun proqram haqqında ümumiyyətlə məlumatı olmadığı üzə çıxıb. Bu məqam proqramın üzv dövlətlərin təhsil və elm ictimaiyyəti tərəfindən kifayət qədər tanınmadığını göstərir və proqramın canlandırılması üçün müvafiq qurumlar tərəfindən lazımi addımların atılmasını zəruri edir".

"Beləliklə, şübhə etmirəm ki, "Türk barometri 2024"ün nəticələri türk dövlətlərinin elm və təhsil sahəsində əməkdaşlığın mövcud vəziyyəti ilə bağlı kifayət qədər real və dolğun mənzərəni təqdim etməklə bu sahədə ölkələrimiz arasında inteqrasiyanın həyata keçirilməsi üçün olduqca faydalı və informativ bir məlumat bazasını təşkil edir".

Mərahim Nəsib