Salyan rayonunda fərdi yaşayış evinə ildırım düşməsi yanğınla nəticələnib.
Oxu.Az xəbər verir ki, hadisə rayonun Şorsulu kəndində qeydə alınıb.
Belə ki, ildırım kənd sakini Marif Məmmədova məxsus evə düşüb. Nəticədə yaşayış evinin bir otağı yanaraq yararsız vəziyyətə düşüb, evə və məişət əşyalarına ciddi ziyan dəyib.
Ev sahibinin sözlərinə görə, hadisə səhər saat 5:00 radələrində baş verib. Həmin vaxt oyaq olduğundan yanğını vaxtında görərək təhlükədən xəbər tutub.
Əraziyə cəlb olunan Salyan Dövlət Yanğından Mühafizə İdarəsinin əməkdaşları alovun digər otaqlara keçməsinin qarşısını alıblar.
Hadisə nəticəsində xeyli maddi ziyan dəysə də, yanğının vaxtında aşkarlanması və yanğınsöndürənlərin operativ müdaxiləsi daha böyük fəsadların qarşısını alıb.
İqbal Ziya
