Şamaxı-Muğanlı yolunda avtomobillərin hərəkəti bərpa olunub - YENİLƏNİB + FOTO/VİDEO

Şamaxı-Muğanlı yolunda avtomobillərin hərəkəti bərpa olunub.

“Report”un Yuxarı Şirvan bürosu xəbər verir ki, əraziyə Daxili İşlər Nazirliyinin əməkdaşları və aidiyyəti qurumların xeyli sayda canlı qüvvəsi və texnikası cəlb edilib.

İsmayıllı yolunda isə vəziyyət ağır olaraq qalır. Hazırda həmin ərazidə də təxirəsalınmaz zəruri işlər həyata keçirilir.

Məsələ ilə bağlı Daxili İşlər Nazirliyinin Mətbuat Xidmətindən verilən məlumata görə, Şamaxı-İsmayıllı avtomobil yollarında hərəkət təşkil olunur. Yollara xüsusi avtomobillərlə qum və duz səpilir.

Hərəkət dayandırılmayıb, sadəcə yollarda sürət həddi endirilib deyə sıxlıq yaranıb. Tədbirlər davam edir.

Şamaxı-İsmayıllı avtomobil yollarında hava şəraiti ilə əlaqədar əraziyə polis əməkdaşları əlavə heyətlə xidmətə çıxarılıb.

DYP ilə yanaşı, Şamaxı, İsmayıllı və Ağsu rayon polis şöbələrinin əməkdaşları da ərazidə xidmətə cəlb ediliblər.

20:52

Güclü qar səbəbindən Şamaxı-İsmayıllı avtomobil yolu bağlanıb.

“Report” xəbər verir ki, hazırda ərazidə 200-dən artıq avtomobil yolda qalıb.

İlkin məlumatlara əsasən, Muğanlı yolunda qar daha keçilməz xarakter daşıyır. Qarın qalınlığı 10 sm-dən artıqdır və yollar buz bağlayıb.

Yolların buz bağlaması səbəbindən ərazidə bir neçə zəncirvari qəza da meydana gəlib.

Əraziyə polis əməkdaşları cəlb olunublar. Hazırda vəziyyətin aradan qaldırılması istiqamətində zəruri tədbirlər həyata keçirilir.