Sertifikasiya imtahanında GÜZƏŞT var? - Üzrlü səbəb və uğursuzluqla üzləşən müəllimlər nə edəcəklər?

Qarşıdan müəllimlərin sertifikasiya imtahanları gəlir.

Sertifikatlaşdırma prosesinin test imtahanı mərhələsi ilk dəfə cəlb olunacaq müəllimlər üçün 21, 22, 24 iyun tarixlərində, ötən il uğur qazana bilməyən müəllimlər üçün isə 8 iyun tarixində keçiriləcək.

Bununla bağlı müəllimləri maraqlandıran bəzi suallar sosial mediada müzakirə mövzusuna çevrilib - üzrlü səbəbdən sertifikasiya imtahanına gedə bilməyən və ya imtahandan keçə bilməyən müəllimləri nə gözləyir? Hansı müəllimlər imtahandan azad oluna bilərlər və s.

Məsələ ilə bağlı Məktəbəqədər və Ümumi Təhsil üzrə Dövlət Agentliyinə sorğu ünvanladıq.

Qurumdan Oxu.Az-ın sorğusuna cavab olaraq bildirildi ki, üzrlü səbəblərdən sertifikatlaşdırmada iştirak etməyən və ya sertifikatlaşdırmadan keçməyən şəxslər bir il müddətində iş yeri saxlanılmaqla, təkrar sertifikatlaşdırmada iştirak etmək hüququna malikdirlər:

"Test imtahanı mərhələsində uğur qazanmayan müəllimlər test imtahanlarına, müsahibə mərhələsində uğur qazanmayan müəllimlər isə birbaşa müsahibəyə dəvət olunurlar.

Təkrar sertifikatlaşdırma prosesində uğur qazanmayan təhsilverənlərlə bağlanmış əmək müqaviləsinə xitam verilir".

Sertifikatlaşdırmadan keçməyən (azad olunan) təhsilverənlərə gəlincə, qurumdan bildirilib ki, onlar aşağıdakılardır:

1. Hamilə qadınlar;

2. Uşağının üç yaşınadək sosial məzuniyyətdə olan və ya həmin məzuniyyət bitdikdən sonra bir ildən az müddətdə müvafiq vəzifədə (peşədə) çalışan qadınlar (uşağını təkbaşına böyüdən kişilər);

3. İlk dəfə işə qəbul olunanlar, üç il müddətində;

4. Azı üç dəfə sertifikatlaşdırmadan keçmiş şəxslər.

Qeyd edək ki, 2024-cü il üçün təşkil olunacaq sertifikatlaşdırma prosesində riyaziyyat və xarici dil (ingilis dili, rus dili, Azərbaycan dili (rus bölməsi), alman dili, fransız dili və s.) fənlərini tədris edən təhsilverənlər, eyni zamanda, ibtidai sinif, Azərbaycan dili və ədəbiyyatı müəllimləri iştirak edəcəklər.

Əzizə İsmayılova