Tovuzda yaşayış binasında yanğın QƏSDƏN TÖRƏDİLİB? - Xəsarət alan var

Tovuz rayonunda yaşayış binasında baş verən yanğınla bağlı bəzi detallar məlum olub.

Oxu.Az xəbər verir ki, yanğının baş verdiyi mənzil Sinəxanım Həsənovaya məxsusdur.

Hadisəni S.Həsənovanın oğlu Firdovsi Həsənovun qəsdən törətdiyi ehtimal edilir.

İddiaya görə, F.Həsənov hadisəni törədən zaman spirtli içkinin təsiri altında olub.

Onun intihar məqsədilə yaşadığı mənzili yandırdığı bildirilir. Firdovsi Həsənov müxtəlif dərəcəli yanıq xəsarətləri alıb.

Fövqəladə Hallar Nazirliyi Tovuzdakı yanğınla bağlı geniş məlumat yayıb.

Oxu.Az xəbər verir ki, FHN-in Mətbuat Xidmətinin yaydığı məlumatda bildirilir:

"Fövqəladə Hallar Nazirliyinin "112" qaynar telefon xəttinə Tovuz şəhəri, Vaqif küçəsində beşmərtəbəli yaşayış binasında yanğın baş verməsi barədə məlumat daxil olub.

Məlumatla əlaqədar dərhal FHN-in Dövlət Yanğından Mühafizə Xidməti Tovuz rayon Yanğından Mühafizə Hissəsinin qüvvələri əraziyə cəlb edilib.

Yanğınsöndürənlərin çevik müdaxiləsi sayəsində binanın birinci mərtəbəsində yerləşən mənzildə baş vermiş yanğın qısa müddətdə söndürülüb.

Yanğın nəticəsində ümumi sahəsi 50 kv.m olan üçotaqlı mənzilin yanar konstruksiyaları yanıb, qonşu mənzillər yanğından mühafizə olunub.

Yanğın zamanı köməksiz vəziyyətdə qalmış dörd nəfər bina sakini yanğınsöndürənlər tərəfindən xilas olunub, yeddi nəfər təhlükəsiz əraziyə təxliyə edilib, xəsarət almış bir nəfər isə təcili tibbi yardım briqadasına təhvil verilib", - deyə məlumatda vurğulanır.

Tovuz şəhəri, Vaqif küçəsindəki beşmərtəbəli yaşayış binasında baş verən yanğın zamanı xəsarət alanların son durumu da açıqlanıb.

Tibbi Ərazi Bölmələrini İdarəetmə Birliyindən (TƏBİB) Oxu.Az-ın sorğusuna cavab olaraq bildirilib ki, aprelin 4-ü, saat 13:00-da Tovuz Rayon Mərkəzi Xəstəxanasının Təcili yardım şöbəsinə tüstüdən zəhərlənmə diaqnozu ilə doqquz nəfər (beşi kişi, dördü qadın cinsli olmaqla) hospitalizasiya edilib.

"Onlardan üçü azyaşlıdır. Xəstələrə zəruri tibbi yardım göstərilib. Bir nəfərin vəziyyəti orta ağır, digərlərinin vəziyyəti isə kafi qiymətləndirilir", - deyə məlumatda bildirilir.

13:06

Tovuz rayonunun Tovuz şəhəri ərazisində yanğın hadisəsi baş verib.

Oxu.Az xəbər verir ki, yanğın beşmərtəbəli binada qeydə alınıb.

Fövqəladə Hallar Nazirliyinin (FHN) Mətbuat Xidmətindən Oxu.Az-ın sorğusuna cavab olaraq bildirilib ki, yanğın qısa müddətdə söndürülüb.

"İlkin məlumata görə, dörd nəfər xilas edilib, bir nəfər xəsarət alıb. Əlavə məlumat veriləcək", - deyə məlumatda qeyd olunub.

Tovuzda yaşayış binasında yanğın QƏSDƏN TÖRƏDİLİB? - Xəsarət alan var

Əzizə İsmayılova