"2026-2027-ci tədris ili üçün nəzərdə tutulan Dövlət Proqramı çərçivəsində sənəd qəbulu zamanı təsdiqlənən yenilənmiş siyahıya uyğun olaraq, namizədlərə 15 prioritet ixtisas sahəsi üzrə təhsil almaq şansı verilib".
Oxu.Az xəbər verir ki, bunu Dövlət Proqramı İdarəetmə Qrupunun rəhbəri Turan Topalova media nümayəndələrinə açıqlamasında bildirib.
O qeyd edib ki, müraciət edənlər dünyanın 33 müxtəlif ölkəsində yerləşən 231 reytinqli ali təhsil müəssisəsində tədris edilən ümumilikdə 4 121 proqram üzrə təhsil hüququ qazana bilərlər:
"Dövlət Proqramı çərçivəsində illik yer sayı 500 nəfər müəyyənləşdirilib. Bu yerlər uğrunda rəqabət mühitini tənzimləmək üçün müraciətlərin sayına görə prioritet ixtisaslar üzrə keçid ballarının tətbiqi mümkündür.
Xüsusilə vurğulamaq lazımdır ki, Dövlət Proqramının 15 əsas prioritet ixtisas istiqaməti ilə bərabər, cari ildə "Mədəniyyət və incəsənət" sahəsində də imkanlar artırılıb. Belə ki, əvvəlki illə müqayisədə bu sahə üzrə siyahıya əlavə olunan nüfuzlu universitetlərin sayı çoxaldılıb".
Turan Topalova həmçinin əlavə edib ki, beynəlxalq reytinq cədvəllərində ilk 10 pillədə qərarlaşan universitetlərə və doktorantura təhsil səviyyəsinə dair müəyyən dəyişikliklər edilib:
"Həmin dəyişikliklərdən biri "University College London" (UCL) ilə əlaqədardır. Keçən illər ərzində UCL-ə göndərilən tələbələrin sayı nəzərə alınaraq, sözügedən yanaşma 2026-2027-ci tədris ili üçün bu universitetə şamil edilməyəcək və sadəcə təsdiq edilmiş siyahıda yer alan proqramlar üzrə müraciətlərə baxılacaq".
Aygün Mirakif
