XII Qlobal Bakı Forumunda gender müzakirələri: "Vəziyyət ədalətli deyilsə, onu dəyişə bilərik"

XII Qlobal Bakı Forumunda qadınların iqlim dəyişikliyində rolu, gender bərabərliyi müzakirə olunub.

Oxu.Az xəbər verir ki, "Dünya düzəninin yenidən düşünülməsi: Çağırışların fürsətlərə çevrilməsi" adlı XII Qlobal Bakı Forumunda "Gender təhlükəsizliyi və iqlim bağlantısı" mövzusunda keçirilən panel müzakirəsində Latviyanın sabiq prezidenti (1999-2007), Nizami Gəncəvi Beynəlxalq Mərkəzinin həmsədri Vayra Vike-Frayberqa deyib ki, bəşəriyyətin 50 faizi qadındır və buna görə dünyada baş verənlər - müharibələr, iqlim dəyişikliyi qadınların da həyatına təsir edir.

"COP29 konfransında da iqlim dəyişikliyində qadınların roluna toxunuldu. Təəssüf ki, Donald Tramp yaşıl iqtisadiyyatı pul tələsi hesab edir, iqlim dəyişikliyinin qadınların həyatına təsirinə etinasız yanaşır", - deyə o bildirib.

Vayra Vike-Frayberqa çıxışı zamanı kişi-qadın əməkdaşlığının önəminə diqqət çəkib:

"Vəziyyət ədalətli deyilsə, biz əl-ələ verib onu dəyişdirə bilərik. Təəssüf ki, mən bir çox hallarda bunu görə bilmirəm".

Yunanıstanın sabiq baş naziri (2009-11) Giorgius Papandreu nitqinə anasının feminist olmasını xatırlatmaqla başlayıb:

"Mənim anamın 101 yaşı var və o, feministdir, bütün ömrünü qadın hərəkatına həsr edib".

"Diplomatiyada, beynəlxalq təşkilatlarda qadınların olması vacibdir. Onlar problemlərin həlli istiqamətində mütərəqqi həll yolları ilə çıxış edirlər. Mən baş nazirliyim dövründə buna şahidlik etmişəm", - deyə o qeyd edib.

Sabiq nazir də iqlim dəyişikliyinin qadınların həyatına daha çox təsir etdiyini bildirib, onlara dəstəyin vacibliyini xatırladıb.

Panel müzakirəsində çıxış edən Misirin İnsan Hüquqları üzrə Milli Şurasının Prezidenti, Kemet Butros Qali Sülh və Bilik Fondunun icraçı prezidenti, 2009-11-ci illərdə Misirin ailə və əhali naziri Muşirə Xəttab Fələstində sülhə nail olmağın vacibliyini vurğulayıb.

Sabiq nazir, həmçinin iqlim dəyişmələrinə, cəmiyyətdə qadınların roluna toxunub.

"COVID böhranında olduğu kimi, iqlim dəyişmələrində, şirin su ehtiyatlarına əlçatanlıq məsələsində də qadınların iştirakçılığını təmin etməliyik", - deyə o qeyd edib.

Daha sonra çıxış edən Liviyanın Avropa Birliyindəki sabiq səfiri, Şahzadə Talal bin Əbdüləziz Əl Səudun baş müşaviri Farida Allaqi qadın və kişilərin birlikdə səylərinin daha effektiv olacağına inamını ifadə edib. O deyib ki, yeni nəsil fəal qadın və kişilər formalaşmalı, liderlər yetişməli, öz ölkəsini sevən siyasətçilər olmalıdır.

Aləmdə Nəsib