“Yeni Klinika”da tibb işçisinin döyülməsinin TƏFƏRRÜATI - VİDEO

“Yeni Klinika”da tibb işçisi ilə pasiyent arasında insident olub, xəsarət alan var.

Oxu.Az xəbər verir ki, bunu klinikanın İctimaiyyətlə əlaqələr və marketinq, Beynəlxalq əlaqələr şöbəsinin rəhbəri İlham Məmmədov deyib.

O bildirib ki, bir neçə gün öncə səhər saat 7 radələrində müayinə üçün müraciət edən Elxan Hüseynbaba oğlu Hüseynov adlı şəxs klinikanın növbə gözləmə aparatından özü ilə yanaşı müəssisəyə gəlməyən daha 3 nəfər üçün də növbə götürmək istəyib:

“Müəssisənin tibbi qeydiyyatçı vəzifəsində işləyən əməkdaşı ona qanunvericiliyin tələblərinə əsasən, müəssisədə olmayan şəxslərə növbənin götürülməməsi barədə məlumat versə də, qarşı tərəf buna kəskin etiraz edib. Vətəndaşa təkrarən bunun qanunazid olduğunu bildirdikdən sonra E.Hüseynov ətrafda olan çox sayda şəxsin yanında ictimai qaydanı kobud surətdə pozan, cəmiyyətə açıqca hörmətsizlik ifadə edən qərəzli hərəkətlər törədərək, klinika əməkdaşının şərəf və ləyaqətini nalayiq formada qəsdən alçaltmaq məqsədi güdən “şərəfsiz”, “küçük” kimi təhqiramiz ifadələr işlədərək “səni işdən çıxartdıracağam”, “başına oyun açacağam” deməklə hədə-qorxu gələrək ondan müəssisədə olmayan üç nəfər üçün növbə sənədi verilməsini tələb etməkdə davam edib”.

İ.Məmmədzadənin sözlərinə görə, vətəndaş qeydiyyatçının əlində olan növbə sənədlərini almaq üçün onun üzərinə hücum edərək ona zor tətbiq edib sağlamlığına zərər yetirib, qollarını yaralayıb:

“Bu faktla əlaqədar olaraq məhkəmə-tibbi ekspertiza keçirilib. Bundan əlavə Elxan Hüseynbaba oğlu Hüseynov qanunvericiliyin tələblərinə zidd olaraq heç bir icazə olmadan gizli surətdə müəssisənin daxilində video və foto çəkilişlər edib. İctimai yerdə, çox saylı vətəndaşın yanında klinika əməkdaşının üzərinə hücum edərək ona zor tətbiq edib, bədən xəsarəti yetirdiyi, əxlaqa zidd sözlərlə onu təhqir etdiyi üçün Elxan Hüseynbaba oğlu Hüseynovun cinayət məsuliyyətinə cəlb olunması üçün Bakı Şəhəri Nizami rayon Prokurorluğuna müraciət edilib. Hazırda ibtidai araşdırma aparılır”.

“Yeni Klinika”da tibb işçisinin döyülməsinin TƏFƏRRÜATI - VİDEO

Könül Cəfərli