“NEQSOL Holding” Ukraynadakı vəziyyətlə əlaqədar Azərbaycan vətəndaşlarının təxliyəsinə dəstək göstərir.
Holdinq KİV-lərdən daxil olan sorğulara cavab olaraq bildirir ki, təxliyə üzrə işlər Azərbaycan Respublikası Xarici İşlər Nazirliyinin himayəsi altında, Ukraynada və qonşu ölkələrdəki Azərbaycan səfirlikləri və konsulluqları, eləcə də Ukraynanın Azərbaycandakı Fəxri Konsulluğu ilə sıx əməkdaşlıq çərçivəsində həyata keçirilir.
Vətəndaşların qayıtmasını təmin etmək üçün “NEQSOL Holding” və onun tərkibində olan “Bakcell” və “Norm” şirkətləri tərəfindən təyyarə reysləri təşkil olunub və 28 fevral tarixindən etibarən həyata keçirilməkdədir. Humanitar dəstək çərçivəsində vətəndaşlar pulsuz uçuş biletləri ilə təmin olunur.
Qeyd edək ki, bu reyslər Azərbaycan Hava Yolları (AZAL) tərəfindən təşkil edilən uçuşlara əlavə olaraq həyata keçirilir.
“NEQSOL Holding” həmçinin Ukraynanın Kiyev və Xarkov şəhərlərindən 2400-dən çox Azərbaycan vətəndaşının və 185 Türkiyə vətəndaşının dəmir yolu nəqliyyatı ilə Rumıniyanın paytaxtı Buxarest şəhərinə təxliyəsini təşkil edib.
Hazırda təxliyə üzrə işlər davam etməkdədir.
