Qlobal texnologiya nəhəngi “Oracle” şirkəti, Azərbaycanda IT xidmətləri, kommunikasiya və yüksək texnologiyalar sahəsində lider şirkətlərdən biri olan “Azerconnect” şirkətinin maliyyə və insan kapitalının idarə olunması üçün “Oracle Fusion Bulud” tətbiqini seçdiyini bildirib. Bu barədə “Oracle” şirkəti məlumat verib, eləcə də bununla bağlı xəbər bir sıra beynəlxalq media orqanlarında dərc olunub.
Məlumata əsasən, “Azerconnect” artıq Oracle Fusion Cloud Enterprise Resource Planning - ERP (Oracle Fusion Bulud Müəssisə Resurs Planlaması) və “Oracle Fusion Cloud Human Capital Management” – HCM (Oracle Fusion İnsan Resurslarının İdarəolunması) tətbiqlərindən istifadəyə başlayıb. Yeni həllər sayəsində “Azerconnect” məlumatların təhlili, dövrlərin bağlanması, hesabatların hazırlanması və açıqlanması, yeni əməkdaşların işə qəbulu və təlimlərin keçirilməsi, onların effektivliyinin idarəolunması, qiymətləndirilməsi, motivasiyası kimi gündəlik və rutin əməliyyatların avtomatlaşdırılmasına nail olacaq. Beləliklə, şirkətin əməkdaşları strateji biznes problemlərinin həllinə daha çox vaxt ayıra biləcəkdir.
“Azerconnect” şirkətinin Baş direktoru Emil Məsimovun sözlərinə əsasən, “Arxa ofis funksiyalarının transformasiyası bütün dünyada iri telekommunikasiya şirkətləri arasında trendə çevrilib. “Azerconnect” öz müştərilərinə daha rahat və müasir xidmət göstərmək üçün biznesin rəqəmsallaşdırılmasına yönəlik proqramları davamlı olaraq həyata keçirir. Artıq bulud həlli sayəsində xidmətlərlə bağlı bütün mümkün yenilənmələr və dəyişikliklər daha sürətlə baş verəcək və şirkətimiz innovasiya, yeni biliklər və kollektiv təcrübəyə daha sürətli çıxış əldə edəcəkdir”.
“Oracle” şirkətində ECEMEA (Şərqi və Cənubi Afrika, Orta Şərq və Afrika ölkələri) regionu Tətbiqlər üzrə vitse-prezident Waleed Abdel Hamid qeyd edib ki, “Oracle Fusion Cloud ERP və Oracle Fusion Cloud HCM kimi bulud xidmətlərinin tətbiqi “Azerconnect” şirkətinin İT, Maliyyə, Satınalma və İR departamentlərinin işinin səmərəliliyini əhəmiyyətli dərəcədə artırıb. Artıq İR və maliyyə sistemləri daha təhlükəsiz vahid məlumat platformasına qoşulub. Beləliklə, “Azerconnect” mütəmadi olaraq ən son, avtomatik yenilənmə funksiyalarından yararlanır”.
“Azerconnect” haqqında:
“Azerconnect” şirkəti ölkəmizin davamlı inkişaf etməkdə olan İKT və yüksək texnologiyalar sahəsində ilk B2B şirkətdir. Şirkət “NEQSOL Holding” beynəlxalq şirkətlər qrupunun tərkibinə daxildir. “NEQSOL Holding” beynəlxalq şirkətlər qrupu səkkiz ölkədə enerji, telekommunikasiya, yüksək texnologiyalar və tikinti sahələrində fəaliyyət göstərir.
“Oracle” haqqında:
“Oracle” kompleks tətbiqlər dəsti ilə yanaşı “Oracle Cloud” xidmətində təhlükəsiz və avtonom infrastruktur təklif edir. “Oracle” (NYSE: ORCL) barədə əlavə məlumatı www.oracle.com saytından əldə edə bilərsiniz.
