ABŞ-də bir şəxs dəyəri 760 min dollar olan brilyant sırğaları oğurlayıb və daha sonra onları udub.
Oxu.Az xəbər verir ki, bu barədə WKMG nəşri məlumat yayıb.
İstintaqın məlumatına görə, Ceytan Qilder özünü bir basketbolçu üçün zərgərlik məmulatları seçən vasitəçi kimi təqdim edib. O, "danışıqlar" prosesində 760 min dollar dəyərindəki brilyantları götürərək mağazadan qaçmağa cəhd göstərib. Hadisə yerindən uzaqlaşdıqdan sonra polis Vaşinqton dairəsində onun avtomobilini qısa müddətdə aşkarlayıb.
Polis əməkdaşları Qilderin əşyaları udmağa çalışdığını görüblər. Onların bunun qarşısını almaq cəhdləri nəticəsiz olub.
Daha sonra həbsxanada aparılan rentgen müayinəsi zamanı oğurlanmış sırğaların saxlanılan şəxsin mədəsində olduğu görünüb.
Brilyantlar təbii yolla bədəndən xaric edildikdən sonra təmizlənmək və yoxlanılmaq məqsədilə yenidən mağazaya təhvil verilib. Baş zərgər daşların seriya nömrələrinin oğurlanan əşyalarla eyni olduğunu təsdiq edib.
