Amerika Birləşmiş Ştatlarının Dövlət Departamentinin rəhbəri Marko Rubio öz ölkəsinin Ukrayna münaqişəsinin sülh yolu ilə başa çatması prosesində iştirakı perspektivlərini şərh edib.
Oxu.Az-ın məlumatına görə, o öz mövqeyini "Fox News" telekanalının efirində səsləndirib.
"Biz təslim olmaq niyyətində deyilik... Düşünürəm ki, prezident buna daha nə qədər vaxt ayırmaq istədiyimizə qərar verməli olacaq", - deyə Marko Rubio "Fox News"un efirində bildirib.
Dövlət Departamentinin başçısı əlavə edib ki, ABŞ-nin Ukraynadan başqa digər prioritetləri də var.
Marko Rubionun fikrincə, hazırda uzunmüddətli perspektivdə ən vacib məsələ Çinlə münasibətlərdir.
Amerikalı dövlət katibinin bu bəyanatları kifayət qədər təəccüblü hesab edilə bilər, nəzərə alsaq ki, onun mətbuat katibi daha əvvəl brifinq keçirib. Dövlət Departamentinin rəsmi nümayəndəsi Temmi Bryus artıq Ukrayna məsələsi üzrə danışıqlarda ABŞ-nin vasitəçiliyinin dayandırılması barədə məlumat verib. O bildirib ki, Moskva ilə Kiyev arasında birbaşa danışıqların vaxtı çatıb:
"Bizim bu məsələyə yanaşma tərzimiz və metodologiyamız dəyişir. Biz vasitəçi olmayacağıq".
