2020-ci il ərzində Çin 220 milyon ABŞ-li seçicinin şəxsi məlumatlarına qeyri-qanuni yolla çıxış əldə edib.
Oxu.Az xəbər verir ki, bu barədə Amerika Birləşmiş Ştatlarının Prezidenti Donald Tramp xalqa müraciətində deyib.
"2020-ci ilin seçki kampaniyası dövründən etibarən Çin Xalq Respublikası, böyük ehtimalla, tarixdə ən genişmiqyaslı məlumat oğurluğunu reallaşdırıb. Bu addım nəticəsində Çin 220 milyon ABŞ vətəndaşının seçici qeydlərinə qanunsuz sahib olub. Ələ keçirilən məlumatlar bazasında insanların adları, yaşadıqları ünvanlar, əlaqə nömrələri, siyasi mövqeləri və digər konfidensial detallar yer alıb", - deyə Ağ Evdən xalqa televiziya vasitəsilə səslənən prezident qeyd edib.
Donald Trampın bu açıqlamasına isə rəsmi Pekindən cavab gecikməyib. Çinin Vaşinqtondakı diplomatik nümayəndəliyi səsvermə prosesinə müdaxilə ilə bağlı irəli sürülən iddiaları birmənalı olaraq təkzib edib. Səfirliyin mövqeyini "CBS News" telekanalı işıqlandırıb.
"Çin dövləti daim başqa ölkələrin daxili məsələlərinə müdaxilə etməmək prinsipinə əsaslanır. Birləşmiş Ştatlardakı seçki prosesi sırf ABŞ-nin öz daxili işidir. Bu prosesin yekunları ABŞ xalqının səsləri ilə müəyyənləşdirilir. Çin ABŞ-nin prezident seçkisinə heç bir zaman müdaxilə etməyib və bundan sonra da etməyəcək", - deyə diplomatik qurumun bəyanatında vurğulanıb.
