ABŞ Federal Beynəlxalq Ticarət Məhkəməsi Prezident Donald Trampın prezident səlahiyyətlərindən sui-istifadə etdiyini əsas gətirərək, onun idxala gömrük rüsumları tətbiq etmək qərarının icrasını əngəlləyib.
Oxu.Az xəbər verir ki, bu məhkəmənin elektron məlumat bazasında dərc olunan sənəddə bildirilir.
Sənəddə qeyd olunub ki, tariflərin tətbiqi ilə bağlı etiraz edilmiş sərəncamlara xitam veriləcək və həmişəlik dayandırılacaq.
Məhkəmənin qərarında bildirilir ki, Tramp yeni idxal tariflərini elan etməklə, Beynəlxalq Fövqəladə İqtisadi Səlahiyyətlər Aktı (IEEPA) ilə prezidentə verilən səlahiyyətləri aşıb.
Məhkəmə Trampın təkcə aprelin 2-də elan etdiyi 185 ölkə və bölgədən gələn məhsullara cavab tariflərini deyil, həm də bu ölkələrin hökumətlərinin ABŞ-yə fentanil qaçaqmalçılığı ilə mübarizədə kifayət qədər səy göstərmədiyi iddiası ilə daha əvvəl Kanada, Çin və Meksikadan idxala tətbiq etdiyi tarifləri bloklayıb. Qeyd olunur ki, məhkəmənin qərarı avtomobillərin və onların ehtiyat hissələrinin, polad və alüminiumun tədarükü tariflərinə şamil edilmir. Onlar "Ticarətin genişləndirilməsi qanunu"na uyğun olaraq təqdim edilib. Məhkəmə Trampın başqa qanun əsasında səlahiyyətlərini aşması barədə qərar verib. Bu o deməkdir ki, qərar Çindən tədarüklərə görə 30%, Meksika və Kanadadan bəzi malların idxalına 25%, eləcə də 10% universal rüsumlara təsir edəcək.
