"Airbus", "Thales" və "Leonardo" şirkətləri öz kosmos bölmələrini birləşdirmək və amerikalı milyarder İlon Maskın "SpaceX" şirkəti ilə rəqabət aparacaq Avropada müştərək müəssisəsini yaratmaq barədə razılıq əldə ediblər.
Oxu.Az-ın TASS-a istinadən verdiyi məlumata görə, bu barədə aylarla davam edən üçtərəfli danışıqların nəticələrinə dair birgə bəyanatda bildirilir.
Razılaşmaya əsasən, "Airbus"a 25 min nəfərin çalışacağı və illik gəliri təxminən 6.5 milyard avro (7.5 milyard dollar) olacaq vahid şirkətin səhmlərinin 35%-i məxsus olacaq. "Thales" və "Leonardo" isə hərəyə 32.5% sahibi olacaqlar.
"Kosmos sənayesinin yeni Avropa iştirakçısı üç fəaliyyət istiqamətini - peyklərin və kosmik sistemlərin istehsalı, həmçinin kosmik xidmətlərin göstərilməsini birləşdirərək, öz imkanlarını genişləndirməyə və artırmağa çalışır", - deyə bəyanatda qeyd edilib.
Avropaya dünya kosmik bazarında əsas oyunçu rolunu gücləndirmək imkanı verəcək yeni müəssisə, tənzimləyici orqanların icazələrinin alınması və sövdələşmənin bağlanmasının digər şərtlərinin yerinə yetirilməsi şərti ilə 2027-ci ildə fəaliyyətə başlaya bilər.
