Almaniya kansleri Fridrix Mertsin pilot lisenziyası dayandırıldığından, artıq o, təyyarəni müstəqil idarə edə bilmir. Şəxsi "Diamond DA62" təyyarəsini isə satıb.
Oxu.Az bu barədə Almaniyanın "Bild" nəşrinə istinadən xəbər verir.
F.Mertsin uçmağa son verməsi Xristian-Demokrat İttifaqı Partiyasının qurultayına səfərindən sonra müəyyənləşib. Kansler təyyarənin kabinəsində göründüyündən, bəzi jurnalistlər nəqliyyat vasitəsini onun özünün idarə etdiyini düşünüblər.
Lakin "Bild"in məlumatına görə, Merts sadəcə sərnişin qismində olub. Təyyarə çarter şirkətinə məxsus olub, idarəetməsinə isə peşəkar pilot cavabdehlik daşıyıb.
Qeyd edək ki, Almaniya kansleri şəxsi pilot lisenziyasını 2009-cu ildə alıb. Daha sonra o, ikimühərrikli "Diamond DA62" təyyarəsi əldə edib.