Dekabrın 11-12-də Aşqabadda Türkmənistanın neytrallığının 30-cu ildönümünə həsr olunan Beynəlxalq sülh və etimad forumu keçiriləcək.
Tədbirdə Türk Dövlətləri Təşkilatına üzv ölkələrin liderlərinin, həmçinin Rusiya Prezidenti Vladimir Putinin iştirakı gözlənilir.
Oxu.Az forumun rəsmi saytına istinadən xəbər verir ki, Birləşmiş Millətlər Təşkilatının Baş Assambleyasının 2025-ci ili "Beynəlxalq Sülh və Etimad İli" elan etməsi ilə əlaqədar yüksəksəviyyəli tədbirin keçirilməsi istiqamətində işlər davam etdirilir:
"Baş Assambleyanın yuxarıda qeyd olunan qətnaməsində təsbit olunduğu kimi, beynəlxalq ictimaiyyətin davamlı, sabit və ədalətli sülhün qurulması iradəsini təşviq etmək və buna praktiki uzunmüddətli təkan vermək üçün Türkmənistan beynəlxalq forumunun keçirilməsi qərarına gəlib.
Türkmənistan 2025-ci ildə beynəlxalq forumun keçirilməsini qlobal hadisə və beynəlxalq münasibətlərdə keyfiyyətcə yeni mərhələyə keçmək üçün real imkan kimi qiymətləndirir.
Beləliklə, Türkmənistan bütün dövlətləri və beynəlxalq təşkilatları sülh və etimad ideyasının həyata keçirilməsinin siyasi, ideoloji və praktiki aspektləri də daxil olmaqla birgə işləməyə çağırır".
