"Audi" şirkəti avtomobil studiyasını satışa çıxardı

"Audi" şirkəti məşhur avtomobil dizaynı və mühəndislik studiyası olan "Italdesign"ı satmağı planlaşdırır.

Oxu.Az "Automotive News Europe"a istinadən xəbər verir ki, bu qərar səmərəliliyin artırılması və xərclərin azaldılması proqramı çərçivəsində qəbul edilib.

Məlumata görə, rəsmi açıqlama mayın 12-də edilə bilər.

İlk adı "Italdesign Giugiaro" olan atelye 1968-ci ildə İtaliyanın Turin şəhərində məşhur konstruktor Corcetto Cudcaro tərəfindən yaradılıb. Şirkət "Volkswagen Golf GTI", "BMW M1", "Lancia Delta", "Saab 9000" və "Delorean DMC-12" daxil olmaqla onlarla konsept-kar və seriyalı model hazırlayıb.

Studiyanın Çin, Avropa və ABŞ-da təxminən 1000 işçisi var. Potensial alıcı haqqında hələ heç bir məlumat yoxdur.