Braziliyalı gənc oyunçu "Mançester Siti" ilə müqavilə imzaladı

"Palmeyras" klubunun və Braziliyanın U-21 millisinin müdafiəçisi Vitor Reis İngiltərənin "Mançester Siti" klubu ilə 2029-cu ilin yayına qədər müqavilə imzalayıb.

Oxu.Az xəbər verir ki, məlumatı "Mançester Siti"nin mətbuat xidməti yayıb.

"Hər kəs "Mançester Siti"nin son mövsümlərdə əldə etdiyi heyrətamiz nailiyyətləri görüb və mən klubun gələcəkdə qazanacağı kuboklar yolunda öz izimi buraxmaq istəyirəm. Pep Qvardiola ilə işləmək hər bir gənc oyunçunun istəyidir və bilirəm ki, o, mənə daha yaxşı oyunçu olmağımda kömək edə bilər", - deyə gənc istedad vurğulayıb.

Qeyd edək ki, 19 yaşlı braziliyalı "Palmeyras"ın əsas heyətində 22 oyun keçirib və iki qol vurub. "Transfermarkt" oyunçunun bazar dəyərini 14 milyon avro qiymətləndirir.