Böyük Britaniya hökuməti "Embers of an Empire" rok-qrupu və "Rampage Productions" musiqi leyblini terrorla mübarizə sanksiyaları siyahısına əlavə edib.
Oxu.Az-ın xəbərinə görə, bu barədə Böyük Britaniya Nazirlər Kabinetinin saytında yerləşdirilən məlumatda bildirilib.
Həmçinin qeyd edilir ki, "Embers of an Empire" terrorizmi təbliğ edən məzmunlu musiqilərin yayılması vasitəsilə terrora yardım edib və onu təşviq etməkdə davam edir. Məhdudiyyətlərə bu hüquqi şəxslərin aktivlərinin dondurulması daxildir.
Xatırladaq ki, sentyabrın 11-də "Embers of an Empire"nin üzvləri Stiven və Rouzi Talland irqi ədavəti qızışdırdıqları üçün London məhkəməsi tərəfindən müvafiq olaraq 2 il və 18 ay müddətinə azadlıqdan məhrum ediliblər. Onların atası, həmçinin terrorizmi təbliğ etməkdə ittiham olunan Robert Talland 2019-cu ildə Lidsdə konsert təşkil etdiyinə görə 4 il həbs cəzası alıb.
