Britaniyanın məxfi hərbi layihələri təhlükə altındadır

ABŞ-nin yarımkeçirici istehsalçısı "Coherent"in Böyük Britaniyadakı zavodunun bağlanması ölkənin müdafiə layihələrinə təhlükə yarada bilər.

Oxu.Az xəbər verir ki, bu barədə "The Telegraph" qəzeti məlumat yayıb

Qeyd olunur ki, Böyük Britaniyanın məxfi hərbi layihələri ölkədə qalan son mikroçip fabriklərindən birinin bağlanması təhlükəsi ilə bağlı təxirə salına bilər.

Şirkət "Apple" ilə əməkdaşlığa son qoyduğu üçün bağlana bilər. "Coherent"in hesabatında bildirilir ki, texnologiya müqavilələrinin itirilməsi onun işini sual altına alır. Hazırda şirkət istehsalata yeni texnologiyaların tətbiqi və ya biznesin satışı variantlarını nəzərdən keçirir.

"Coherent"in mühüm müştəriləri arasında krallıqda radar sistemləri, elektron döyüş cihazları və helikopterlər istehsal edən İtaliyanın "Leonardo" mühəndislik qrupu da var. Zavod, həmçinin "Typhoon" döyüş təyyarələri və Böyük Britaniyanın digər hərbi layihələri üçün çiplər tədarük edirdi.

Nəşr vurğulayır ki, zavod bağlanarsa, "Leonardo" tədarükçüləri başqa ölkələrdə axtarmağa məcbur olacaq və Böyük Britaniyanın yarımkeçiricilər sektorunda istehsal potensialı azalacaq.