Cənubi Koreyanın Çedju adasında əcnəbi vətəndaşın hərəkətləri ciddi narazılıqla qarşılanıb. Belə ki, həmin şəxsin adanın mədəni irsinin ayrılmaz parçası sayılan "hənyo" (dalğıc qadınlar) heykəlini qucaqlayaraq öpməsini əks etdirən video böyük qalmaqal yaradıb.
Oxu.Az bu barədə "The Korea Herald" nəşrinə istinadən xəbər verir.
Çoçxon ərazisindəki Hamdok çimərliyi yaxınlığında lentə alınan bu kadrlar qısa müddətdə sosial platformalarda yayılaraq yerli əhalinin sərt qınağına tuş gəlib. Görüntülərdə əcnəbinin heykəlin üstünə çıxaraq nümayişkaranə şəkildə davrandığı, yanında olan dostlarının isə bu vəziyyətə güldüyü əks olunub.
Yerli mətbuatın yazdığına görə, həmin əcnəbi təqribən bir ildir ki, Çedju adasında məskunlaşıb. Hadisənin videosunu isə adanın yerli sakini olan bir koreyalı lentə alaraq internetə yükləyib. Yaranan kütləvi etirazlardan sonra videonu çəkən şəxs üzrxahlıq edərək, məqsədinin kimisə təhqir etmək olmadığını və bu addımının cəmiyyətdə necə qarşılana biləcəyini fərq etmədiyini vurğulayıb.
Qeyd olunur ki, əcnəbinin öpdüyü "hənyo" heykəli milli qeyri-maddi mədəni irs kimi tanınıb və UNESCO-nun siyahısına daxil edilib.
