Çin Elmlər Akademiyasının Onurğalıların Paleontologiyası və Paleoantropologiya İnstitutundan olan tədqiqat qrupu Çinin cənub-şərqindəki Fuszyan əyalətində Yura dövrünün süxurlarında iki quş qalıqları aşkar edib.
Oxu.Az-ın Scitechdaily.com nəşrinə istinadən verdiyi məlumata görə, bununla bağlı tədqiqatın nəticələri "Nature" jurnalında dərc olunub.
Məlumata görə, təxminən 149 milyon il yaşı olan bu qalıqlar quşların erkən təkamülü ilə bağlı daha dəqiq təsəvvürün yaranmasına kömək edir.
Bəzi makrotəkamül tədqiqatları, quşların ən erkən diversifikasiyasının Yura dövründə (təxminən 145 milyon il əvvəl) baş verdiyini göstərir. Bununla belə, son tədqiqatlar Yura dövrünün hamı tərəfindən tanınan yeganə Arxeopteriks quşunun statusunu şübhə altına alıb. Belə ki, Arxeopteriks quşlara qohum olan Deynonixozavr dinozavrı kimi təsnif edilib.
Bu araşdırmada isə elm adamları tapılan iki qalqıdan birinə "Baminornis zhenghensis" adını veriblər. "Baminornis zhenghensis" qısa quyruğa malikdir ki, bu, müasir quşlarda da müşahidə edilir. Bu xüsusiyyətlər isə quşların erkən inkişafında mozaika təkamülünün rolunu əks etdirir.
Bundan əvvəl isə qısaquyruqlu quşların ən erkən qeydləri erkən Təbaşir dövrünə aid edilirdi. Alimlərin sözlərinə görə, "Baminornis zhenghensis" Yura dövrünə aid olan və bu günə qədər kəşf edilmiş yeganə ən qədim qısaquyruqlu quşdur.
