Çinli mühəndislər elektromaqnit dartma qüvvəsindən istifadə edərək bir neçə tonluq vaqon-platformanı cəmi iki saniyədə 700 km/saat sürətə çatdıra biliblər.
Oxu.Az xəbər verir ki, bu barədə məlumatı Çin Mərkəzi Televiziyası yayıb.
Beləliklə, alimlər bu sahədə yeni dünya rekordu qırıblar. Maqnit levitasiya platforması 400 metrlik sınaq xəttində göstərilən sürətə çatıb və sonra dayandırılıb.
Texnologiya Çanşada (Hunan əyaləti, Mərkəzi Çin) yerləşən Milli Müdafiə Elmi-Texniki Universitetinin mütəxəssisləri tərəfindən hazırlanıb. Maqnit levitasiyası ilə bağlı tədqiqatlar 10 il davam edib.
Telekanalın məlumatına görə, bu inkişaf elektromaqnit hərəkətverici qüvvəsindən istifadə etməklə vakuum nəqliyyatının inkişafına imkan yaradır və aerokosmik texnologiyaların buraxılması və sınaqdan keçirilməsi üçün yeni metodlar təklif edir.
