İkinci Qərb Dairə Hərbi Məhkəməsi Moskva ətrafındakı "Crocus City Hall"da baş vermiş terror aktı ilə bağlı məhkum edilənlərin vəkillərinin şikayətlərini Vlasixa şəhərində yerləşən Apellyasiya Hərbi Məhkəməsinə yönləndirib.
Oxu.Az-ın məlumatına görə, bu barədə TASS-a məhkəmə prosesinin iştirakçılarından biri xəbər verib.
Cinayət işinə aid 500 cilddən artıq material apellyasiya instansiyasına təhvil verilib. Bununla yanaşı, zərərçəkmiş tərəfin də şikayətləri göndərilib. Yaxın vaxtlarda sənədlər apellyasiya instansiyasında qeydiyyata alınacaq və bundan sonra baxılma tarixi müəyyənləşdiriləcək. Məhkəmə dinləmələri qapalı keçiriləcək.
Məlumatda bildirilir ki, hökmlə bağlı müdafiə tərəfinin apellyasiya şikayətləri, eləcə də zərərçəkmişlərin vəkillərinin müraciətləri baxış üçün göndərilib.
Qeyd edək ki, martın 12-də İkinci Qərb Dairə Hərbi Məhkəməsi "Crocus City Hall"da terror aktı işi üzrə qərarını elan edib. Terrorun dörd icraçısı və onlara kömək edən 11 nəfər ömürlük həbs cəzasına məhkum ediliblər. Daha dörd iştirakçı isə 19 il 11 aydan 22 il 6 aya qədər azadlıqdan məhrum edilib. Bütün təqsirləndirilən şəxslərə 500 min ilə 2.7 milyon rubl aralığında cərimə kəsilib.
Xatırladaq ki, "Crocus City Hall"da terror aktı 2024-cü il martın 22-də törədilib. Silahlı hücum edən şəxslər konsertə gələnlərə atəş açıb və binada yanğın törədiblər. Hadisə nəticəsində 140-dan çox insan həyatını itirib, əlavə olaraq 600 nəfər isə yaralanıb. İstintaq müəyyən edib ki, hücum Rusiyada qadağan olunmuş terror təşkilatının tərəfdarları tərəfindən təşkil edilib.
