Fransalı kinoprodüser Nikolas Altmayer və onun həyat yoldaşı, "Dior Couture" brendinin ictimaiyyətlə əlaqələr üzrə direktoru Matilda Favyer Fransanın qərbində baş verən yol-nəqliyyat hadisəsində həlak olublar.
Oxu.Az xəbər verir ki, bu barədə "Le Figaro" qəzeti cütlüyün yaxınlarına istinadən məlumat yayıb.
Məlumata görə, De-Sevr departamentində Altmayer və Favyerin olduğu minik avtomobili yük maşını ilə toqquşub. Hər iki şəxs hadisə yerindəcə keçinib.
Fransanın "Mandarin" prodüser şirkətinin rəhbəri olan Altmayer "Gənc və gözəl" (Jeune & jolie, 2013), "Evdə" (Dans la maison, 2012), "Şokolad" (Chocolat, 2015) kimi tanınmış filmlərin, eləcə də bir sıra teleserialların ərsəyə gəlməsində iştirak edib.
Favyer isə 10 ildən çox müddətdə "Dior Couture" brendində rəhbər vəzifədə çalışıb. O, əvvəllər "Prada" şirkətində və "Glamour" jurnalında da fəaliyyət göstərib.
