Finlandiyanın Otanmyaki kəndində "Google" şirkətinin data mərkəzi tikintisi üçün meşələrin qırılmasından sonra canavarlar yaşayış məntəqəsinə gəlməyə başlayıb.
Oxu.Az xəbər verir ki, bu barədə yerli sakin Anni Ranta "The Guardian" qəzetinə danışıb.
53 yaşlı Rantanın sözlərinə görə, ailəsinin uzun illər bu ərazidə yaşayıb. O, ağacların kəsilməsindən sonra meşədə yaşayan vəhşi heyvanların kəndə üz tutduğunu bildirib.
Qadını tikintinin gələcəkdə yaradacağı səs-küy də narahat edir. Ərazidəki sərt qayalıqlar səbəbindən hətta zəif səslər belə güclü əks-səda yaradır. Ranta bu səbəbdən kənddən köçməyi düşündüyünü deyib.
"Google"un Finlandiyada ümumi dəyəri 13 milyard avro olan layihəsi çərçivəsində Muxosda təxminən 250 min, Otanmyakidə isə 150 min ağacın kəsildiyi bildirilir.
Oktyabrın əvvəlində Finlandiyanın lisenziyalaşdırma və nəzarət orqanı şirkətdən hər iki ərazidə işləri dayandırmağı tələb edib. Səbəb ağacların kütləvi şəkildə kəsilməsindən əvvəl ətraf mühitə təsirin məcburi qiymətləndirilməsinin aparılmaması olub.
"Google"un Finlandiya bölməsinin rəhbəri Antti Yarvinen üzr istəyərək, şirkətin həmin vaxt qüvvədə olan qanunvericiliyi necə başa düşməsinə əsasən hərəkət etdiyini bildirib.
