Gürcüstan Maliyyə Nazirliyinin gəlir xidmətinin əməkdaşları Tbilisi beynəlxalq aeroportunda “Poçta Qruzii” MMC anbarında ümumi çəkisi 209,4 kq olan böyük sayda tramadol və apaurin aşkar ediblər.
Oxu.Az “Novosti Qruziya”ya istinadən xəbər verir ki, yük Sloveniyaya tranzit ilə gəlib və Ermənistana çatmalı idi.
“Yoxlama zamanı yükü müşayiət edən sənədlərdən aşkar edilib ki, Ermənistanda qeydə alınmış şirkətin qəbul edilməli olduğu malın tərkibində narkotik maddələr - 3 min bağlama apaurin (Apaurin solution 10mg), 500 qutu tramadol (Tramadol solution 100mg/2ml) və 300 qutu tramadolun daxil olduğu preparatlar var”, - idarənin mətbuat xidmətindən aprelin 29-da çərşənbə günü bildirilib.
“Narkotik vasitələr, psixotrop maddələr, prekursor və narkoloji yardım haqqında Qanun”a görə, tramadol narkotik vasitə hesab edilir. Bu preparatın Gürcüstana tranziti qadağandır.
Hal-hazırda yük saxlanılıb və fakt barədə Gürcüstanın DİN Mərkəzi kriminal polis departamentinin Narkotiklərin qanunsuz dövriyyəsi ilə mübarizə üzrə baş idarəsinə yazılı şəkildə bildirilib.
