Gürcüstanda Tbilisi Şəhər Məhkəməsi oktyabrın 4-də ölkə paytaxtında prezident sarayına basqın etməkdə şübhəli bilinən 5 nəfər barəsində həbs qətimkan tədbiri qərarı verib.
Oxu.Az bu barədə "İnterpressnews" nəşrinə istinadən məlumat verir ki, ittiham üzrə opera müğənnisi Paata Burçuladze, Gürcüstanın keçmiş baş prokuroru Murtaz Zodelava, həmçinin müxalifətçilər İrakli Nadiradze, Paata Mandjqaladze və Laşa Beridze həbs ediliblər.
Prokuror Vaja Todua bildirib ki, istintaq dövründə həbs qətimkan tədbiri müttəhimlərin qaçmaq ehtimalı, yeni cinayətlər törətmə ehtimalı və ya dəlilləri məhv edə biləcəyi ilə bağlı narahatlıqlara görə zəruridir.
Təqsirləndirilən şəxslərin vəkilləri məhkəmədə prokurorun vəsatəti ilə razılaşmayıblar və işin siyasi motivli olduğunu bəyan ediblər. Onlar həmçinin müvəkkillərinin həbs qətimkan tədbiri olmadan azadlığa buraxılmasını tələb ediblər. Beş müttəhimdən heç biri özünü təqsirli bilməyib.
Sonda məhkəmə prokurorun vəsatətini təmin edərək, təqsirləndirilən şəxslər barəsində həbs qətimkan tədbiri seçib.
Bu şəxslər qrup şəklində zorakılığı təşkil etməkdə və iştirakçılıqda, strateji və ya xüsusi obyektləri ələ keçirməyə və ya blokadaya almağa, konstitusiya quruluşunu zorakılıqla dəyişdirməyə cəhdlərdə və hökumətin devrilməsinə çağırışda ittiham olunurlar. Onları təqsirləndirildikləri maddələr üzrə 9 ilə qədər müddətə azadlıqdan məhrumetmə cəzası gözləyir.
