Hanoydakı yanğında ölənlərin sayı artıb - YENİLƏNİB + FOTO/VİDEO

Vyetnamın Hanoy şəhərinin Thanh Xuan rayonunda yaşayış kompleksində baş verən yanğın nəticəsində azı 56 nəfər ölüb, 37 nəfər xəsarət alıb.

Bu barədə yerli polisə istinadən məlumat yayılıb.

Məlumata görə, ölənlərdən 39 nəfərin şəxsiyyəti artıq müəyyən edilib. Zərərçəkənlərin hamısı xəstəxanaya yerləşdirilib, onların vəziyyəti barədə məlumat verilmir.

Bildirilir ki, yanğın təhlükəsizliyi qaydalarını pozduğuna görə yaşayış binasının sahibinə qarşı cinayət işi qaldırılıb. Hüquq-mühafizə orqanları hadisənin başvermə şəraitini araşdırırlar.

Mənbə: TASS

11:00

Vyetnamın paytaxtı Hanoy şəhərində 10 mərtəbəli yaşayış binasında yanğın baş verib.

Məlumata görə, yanğında 11 nəfər ölüb, 50-dən çox yaralı xəstəxanaya yerləşdirilib.

Qeyd edək ki, yanğın gecə saatlarında binanın birinci mərtəbəsində baş verib. Heç bir xilasedici pilləkəni olmayan 150 nəfərin kirayə mənzillərdə yaşadığı binadan yanğınsöndürənlər 70 nəfəri xilas edə biliblər.

Zərərçəkənlərə, o cümlədən azyaşlı uşaqlara dəm qazından zəhərlənmə və hündürlükdən yıxılma nəticəsində xəsarətlər diaqnozu qoyulub. Hazırda yanğın tamamilə söndürülüb, axtarış-xilasetmə əməliyyatı aparılır.

Mənbə: Mir24