Hindistandakı hakim "Bharatiya Janata" Partiyasının (BJP) rəsmi nümayəndəsi Nipur Şarmanın Məhəmməd peyğəmbərlə bağlı qalmaqallı şərhlərinə görə Yeni Dehlidə etiraz aksiyası keçirilib.
Yüzlərlə müsəlman cümə namazından sonra Cənubi Asiyanın ən böyük ibadət ocağı sayılan Cama məscidində toplaşaraq Şarmanın sözlərini kəskin şəkildə pisləyib və hakimiyyətdən onun həbsini tələb ediblər.
Polis vəziyyəti nəzarətdə saxlayıb və qanun pozuntularına yol verməyib.
Məhəmməd peyğəmbərin təhqir edilməsi Hindistanın şimalındakı Cammu və Kəşmir birlik ərazisində də etirazlara səbəb olub. Dini zəmində qarşıdurmaların qarşısını almaq üçün bölgənin səlahiyyətliləri Bhadervah şəhərində interneti bağlayıb və orada komendant saatı tətbiq edib. Ərazinin paytaxtı Srinaqarda da internet xidmətləri dayandırılıb.
Qalmaqal ötən həftə milli televiziyada debat zamanı Nipur Şarmanın Məhəmməd peyğəmbərlə bağlı şərhlərindən sonra başlayıb. Hindistandakı bir çox müsəlman onun sözlərini təhqiredici hesab edib.
Mənbə: TASS
