İran parlamentinin Milli təhlükəsizlik və xarici siyasət komitəsinin sədri Ebrahim Əzizi ABŞ-nin təhdidlərinə cavab olaraq vəd edib ki, iranlılar ölkə ərazisinə soxulan hər kəsin ayağını kəsəcəklər.
Oxu.Az bu barədə IRNA-ya istinadən xəbər verir.
"Əgər hər hansı təcavüzkarın ayağı İranının müqəddəs ərazisinə qədəm qoyarsa, biz bu ayağı kəsəcəyik. İslam inqilabının təliminə görə, biz heç bir müharibənin təşəbbüskarı olmamışıq, lakin təcavüzkarlara qətiyyətlə və sərt şəkildə qarşı durmağı öyrənmişik. Sionist rejimi (İsrail nəzərdə tutulur - red.) və ABŞ bilməlidirlər ki, əgər onlar uydurma bəhanə ilə milli təhlükəsizliyimizə azacıq da olsa zərər vurmağa cəhd etsələr, dünyanın heç bir yerində özlərini təhlükəsiz hiss etməyəcəklər", - deyə İran parlamentarisi bəyan edib.
Əzizinin sözlərinə görə, ABŞ və ya İsraillə əməkdaşlıq edən hər hansı dövlət İran tərəfindən döyüş hədəf kimi qəbul ediləcək.
Martın 30-da ABŞ Prezidenti Donald Tramp bəyan edib ki, nüvə proqramı ilə bağlı danışıqlarda heç bir irəliləyiş əldə edilməzsə, iki həftə sonra İrana qarşı ikinci dərəcəli rüsumlar tətbiq etmək niyyətindədir. O, sazişin bağlanmasından tam imtina ediləcəyi təqdirdə İranı görünməmiş bombardmanlarla təhdid edib. Öz növbəsində, İranın Ali lideri Əli Xamenei Trampın təhdidlərinə cavab olaraq qeyd edib ki, ABŞ-nin hərbi müdaxiləsinin mümkünlüyünə inanmır, lakin Vaşinqton ölkə daxilində üsyan qaldırmağa cəhd etsə, sərt cavab alacaq.
