Dünən 18 may tarixində İrəvanın Azadlıq meydanından Rusiyanın Ermənistandakı səfirliyinə qədər “Ermənistanda Putinçiliyə yox!” şüarı altında yürüş keçirilib.
Aksiya paytaxt hakimiyyəti ilə razılaşdırılıb, yürüşü polis əməkdaşları müşayiət edib.
Səfirliyin qarşısında polis əməkdaşları yürüş iştirakçılarının qarşısını kəsiblər. İştirakçılar Azadlıq meydanında, eləcə də Rusiya səfirliyinin qarşısında çıxış ediblər.
“Putin, Ermənistandan rədd ol!” “Putin, Cənubi Qafqazdan rədd ol!”, “Rusiya işğalçılarına yox!”, “Rusiya, Ukraynadan rədd ol!”, “ Volınkin – persona non-qrant!”, “Volınkin, Ermənistandan rədd ol!”, “Ermənistan bizim vətənimizdir, Putinin atasının mülkiyyəti deyil!” – belə çağırışlarla çıxış edən natiqlər “rus və erməni xalqları arasında ayrıseçkiliyi məhz Putin imperializminin saldığını” deyiblər. İştirakçılar həmçinin Ukrayna Maydanının şüarlarını səsləndiriblər:
“Yaşasın Ukrayna! Qəhrəmanlara eşq olsun!”
İştirakçılar Ermənistan, Ukrayna və Avropa İttifaqının bayraqlarını dalğalandırıblar.
Səfirliyin hasarına 10 dəqiqəlik yanaşmaq üçün uzun və uğursuz danışıqlardan sonra Paruyr Ayrikyan polislərin özbaşınalıq etdiklərini xəbər vermək üçün Ermənistanın polis rəisinin nömrəsini istəyib.
Qeyd edək ki, may ayının 1-də Beynəlxalq həmrəylik günündə bir qrup şəxs Sovet simvollarının olduğu qırmızı bayraqlarla, Putin Rusiyasına və şəxsən Putinə öz rəğbətlərini bildirmək üçün Rusiya səfirliyinin yanına gələrək Ermənistanı mümkün qədər tez Gömrük İttifaqına qəbul etməsinə çağırıb. O zaman polislər heç bir maneçilik törətməyiblər.
Polislərlə danışıqlar nəticə verməyib. İştirakçılar nümayəndə seçiblər, seçilən təmsilçi səfirliyə yaxınlaşaraq iştirakçılar adından məktub təqdim edib.
