İsrail Müdafiə Ordusunun (SAXAL) 146-cı diviziyasının qüvvələri "Hizbullah"a məxsus yeraltı tuneli və çox sayda silah-sursatı məhv edib.
Oxu.Az xəbər verir ki, bu barədə SAXAL "X" hesabında məlumat paylaşıb.
Bildirilir ki, briqadanın bölmələri "Hizbullah"ın hərbi məqsədlər üçün istifadə etdiyi silah anbarını, tank əleyhinə raket komplekslərinin mövqelərini, müşahidə məntəqələrini və binaları aşkar edərək onlara zərbələr endirib:
"Son 24 saat ərzində həyata keçirilən digər əməliyyatlar çərçivəsində diviziyanın mühəndis qoşunları "Hizbullah"ın yeraltı keçidini dağıdıb. Bununla yanaşı, 226-cı briqadanın hərbçiləri yeraltı şaxta yolu, tank əleyhinə mövqe və təşkilata aid xeyli sayda partlayıcı qurğu aşkarlayıblar".
Xəbərə görə, bazar ertəsi "Hizbullah" Livanın cənubunda, ön müdafiə xəttindən cənubda yerləşən SAXAL qüvvələrinə doğru bir neçə zərbə PUA-sı ilə zərbələr endirib.
"Dronlar hərbçilərin yaxınlığında partlasa da, xəsarət alan olmayıb. Bu addım təşkilat tərəfindən atəşkəs razılaşmasının kobud şəkildə pozulması kimi qiymətləndirilir", - deyə məlumatda qeyd edilir.
