İsrail tankları Dəməşqə doğru irəliləyir?

"İsrail qoşunlarının Dəməşqə doğru irəliləməsi barədə məlumatlar həqiqəti əks etdirmir".

Oxu.Az-ın məlumatına görə, bu barədə İsrail Müdafiə Ordusunun (SAXAL) Mətbuat Xidməti məlumat yayıb.

Bildirilib ki, mediada bu yöndə yayılan məlumatlar yalandır:

"SAXAL qüvvələri bufer zonasına və İsrailin müdafiəsi məqsədilə sərhəd yaxınlığındakı müdafiə mövqelərində yerləşib".

11:32

İsrail tankları Dəməşqin təxminən 20 km-nə yaxınlaşıb.

Oxu.Az-ın verdiyi məlumata görə, bu barədə Livanın "Al Mayadeen" telekanalı məlumat yayıb.

Bildirilir ki, tanklar bufer zonasından çıxıb və Suriya paytaxtından 21 km məsafədə yerləşən Katana yaşayış məntəqəsinin yaxınlığına yerləşdirilib.

İsrail Müdafiə Ordusu (SAXAL) hələlik bu məlumatı şərh etməyib.

Daha əvvəl SAXAL-ın Mətbuat Xidməti bildirmişdi ki, piyada və tank qoşunları müdafiə məqsədilə Suriya ilə sərhəd boyunca yerləşdirilib. Yəhudi dövlətinin Baş naziri Benyamin Netanyahu izah edib ki, bu addımlar ərəb respublikasındakı son hadisələrlə əlaqədar atılıb, müdafiə xarakteri daşıyır və müvəqqəti tədbirdir.