İsraildən təkzib: "Hizbullah"a qarşı mübarizəmizi var gücümüzlə davam etdirəcəyik"

İsrail Livanda keçirdiyi hərbi əməliyyatları dayandırmağı planlaşdırmır və bu əməliyyatları "Hizbullah" üzərində tam qələbə qazananadək davam etdirmək niyyətindədir.

Oxu.Az xəbər verir ki, bu açıqlama ilə İsrailin xarici işlər naziri İsrael Katz çıxış edib.

"Şimalda atəşkəs olmayacaq. Qələbə əldə edənə və şimal sakinləri təhlükəsiz şəkildə evlərinə qayıdana qədər "Hizbullah" təşkilatı ilə mübarizəmizi var gücümüzlə davam etdirəcəyik", - deyə İ.Katz qeyd edib.

Həmçinin yerli KİV-in məlumatına görə, İsrailin Baş naziri Benyamin Netanyahu ölkənin Müdafiə Qüvvələrinə şimalda döyüşləri ona təqdim olunan plana uyğun olaraq davam etdirməyi tapşırıb.