Ermənistanın baş naziri Nikol Paşinyan Rusiyaya erməni məhsullarının ixracına tətbiq olunan məhdudiyyətlərlə bağlı mövqeyini açıqlayıb.
Oxu.Az xəbər verir ki, bu barədə "RIA Novosti" məlumat yayıb.
N.Paşinyanın sözlərinə görə, söhbət sanksiyalardan getmir və bu termini işlətmək düzgün deyil.
Baş nazir əlavə edib ki, mövcud məsələləri yaxın vaxtlarda keçiriləcək Avrasiya Hökumətlərarası Şurasının iclasında müzakirə etməyi planlaşdırır.
Bundan əvvəl Rusiyanın Kənd Təsərrüfatına Nəzarət Xidməti Ermənistandan Rusiyaya badımcanın, kartofun və quru meyvələrin idxalını qadağan etmişdi. Daha əvvəl isə Ermənistandan "Cermuk" mineral suyunun, çəyirdəkli meyvələrin, üzümün, albalının, gilasın, ərikin, gavalının, şaftalının və nektarinin, eləcə də diri balıq və balıq məhsullarının tədarükünə məhdudiyyətlər tətbiq olunmuşdu.
