Rusiya Dövlət Dumasının sədri Vyaçeslav Volodin ölkəyə gələn əcnəbilər üçün nəzərdə tutulan rüsumların artırılması ilə bağlı yeni təfərrüat açıqlayıb. Onun sözlərinə görə, ödənişlər simvolik deyil, 5-12 dəfə artırılacaq və bu dəyişiklik yaşamaq icazəsi, yaxud Rusiya vətəndaşlığı əldə etmək istəyən şəxslərə şamil olunacaq.
Oxu.Az xəbər verir ki, Volodin bu barədə "Rusiya 24" telekanalında aparıcı Natalya Litovkoya verdiyi müsahibəsində bildirib.
O, izah edib ki, Dövlət Duması ölkəyə gələnlərin daha layiqli rüsum ödəməsi üçün bu məsələyə yenidən baxılmasını doğru hesab edir.
Siyasətçi əlavə edib ki, əcnəbilər Rusiyadakı həyat tərzinə hörmətlə yanaşmalı, dövlət dilini bilməli, adət-ənənələri uca tutmalı və qanunlara ciddi riayət etməlidirlər.
Dövlət Dumasının sədri həmçinin vurğulayıb ki, hər bir miqrant öz hüquqi öhdəliyini yerinə yetirməli və vətəndaş olanlar Rusiya ordusunda hərbi xidmət keçməlidirlər.
