Rusiyada cəsədi donuzlar tərəfindən didişdirilmiş məktəblinin qətli ilə bağlı istintaq bitdi

Rusiya İstintaq Komitəsi (İK) ötən ilin noyabrında Krasnoyarsk diyarının Ujur rayonundakı donuz fermasında meyiti tapılan 17 yaşlı qızın qətli ilə bağlı istintaqın başa çatdığını açıqlayıb.

Oxu.Az bu barədə vesti.ru-ya istinadən xəbər verir.

Məlumata görə, Ujur rayonunun Uşkanka kəndində yaşayan 41 yaşlı şəxs qəsdən və xüsusi amansızlıqla törədilmiş qətldə, başqa bir cinayəti gizlətmək məqsədilə hərəkətlərdə, yetkinlik yaşına çatmayan şəxsə qarşı onun köməksiz vəziyyətindən istifadə edərək seksual xarakterli hərəkətlərdə və böyük məbləğdə maddi ziyan vurmaqla oğurluqda ittiham olunur.

İstintaq Komitəsinin açıqlamasına görə, qızın ölümü kəskin qan itkisi nəticəsində baş verib.

Təqsirləndirilən şəxs günahını qismən etiraf edib. Hazırda cinayət işi ittiham aktının təsdiqlənməsi üçün məhkəməyə göndərilib.

Xatırladaq ki, 2024-cü il noyabrın 23-də Uşkanka kəndində donuz axurunda 11-ci sinif şagirdi olan qızın heyvanlar tərəfindən didilmiş cəsədi tapılıb. 17 yaşlı məktəblini gecə yarısına yaxın onunla görüşə gələn həmyaşıd dostu aşkar edib. Məlumata görə, dostu qızı evdə tapa bilməyib, tövləni yoxlayanda isə dəhşətli mənzərə ilə üzləşib. O, kömək üçün qonşulara qaçıb, lakin qızı xilas etmək artıq gec olub. Hadisə yerinə gələn tibb işçiləri yalnız ölümü təsdiq edə biliblər.

Qızın başında və bədənində çoxsaylı xəsarətlər qeydə alınıb. İstintaq ilkin olaraq qızın öküzün zərbəsi və ya donuzların hücumu nəticəsində ölə biləcəyi versiyasını araşdırıb. Sonradan isə onun əslində, qonşusu tərəfindən qətlə yetirildiyi müəyyən edilib.

Açıqlamada bildirilir ki, şübhəlinin qızın atası ilə şəxsi münaqişəsi olub. Cinayət də məhz bu düşmənçilik zəminində baş verib. Hadisə zamanı ev sahibləri bazara gediblər. Bu vaxt qonşu mal-qaranı öldürmək məqsədilə sərxoş vəziyyətdə təsərrüfat binasına daxil olub. Qapıda 17 yaşlı qızla rastlaşan şübhəli, onun başına ağacla zərbə endirib. Qız geri çəkilərkən ikinci zərbəni vurub. Məktəbli huşunu itirəndə isə kişi ona təcavüz edib.

İstintaq onu da müəyyən edib ki, şübhəli 2003-cü ilin aprelində qəsdən ağır bədən xəsarəti yetirmə və ehtiyatsızlıqdan ölümə səbəb olma maddəsi ilə beş il həbs cəzasına məhkum edilib. Lakin 2007-ci ildə vaxtından əvvəl şərti azadlığa buraxılıb. Bundan başqa, onun "oğurluq" maddəsi ilə iki dəfə məhkumluğu olub.