Ötən əsrin 90-cı illərinin ən tanınmış muzdlu qatillərindən biri, Rusiyanın "ən cazibədar killer"i kimi tanınan "Lyoşa Soldat" (əsl adı Aleksey Şerstobitov) cəzaçəkmə müəssisəsində yenidən ailə həyatı qurub.
Oxu.Az xəbər verir ki, bu barədə "Baza" "Telegram" kanalı məlumat yayıb.
Məlumata görə, 59 yaşlı Şerstobitov 48 yaşlı Yuliya Q. ilə nikaha daxil olub. Məhkumun yeni həyat yoldaşı Moskvanın tikinti şirkətlərindən birində çalışır.
Bundan əvvəl o, teleaparıcı Sergey Drujkonun sabiq arvadı Marina ilə evli idi. Şerstobitov onunla 2016-cı ildə Lipetsk koloniyasında cəza çəkərkən evlənmiş, 2024-cü ildə isə boşanmışdı. Həmin vaxt o, bir daha evlənmək istəmədiyini bildirmişdi.
Qeyd edək ki, Şerstobitov 12 qətl və sui-qəsd cəhdinə görə 23 illik həbs cəzası çəkir. Onun 2029-cu ildə azadlığa çıxması gözlənilir. O, 90-cı illərdə "Orexovo-Medvedkovo" mütəşəkkil cinayətkar qrupunun killeri olub. Onun qurbanları arasında kriminal avtoritet Otari Kvantrişvili də var.
"Rusiyanın ən cazibədar killer"i reputasiyasını o, xarici görünüşü və ünsiyyət tərzinə görə qazanıb. Həbsdə olarkən kitab və şeirlər yazmağa başlayan məhkumun qadın pərəstişkarları yaranıb.
