Trampın Çinlə ticarət müharibəsində "həssas nöqtəsi" tapıldı

"ABŞ Prezidenti Donald Tramp tərəfindən genişmiqyaslı rüsumların dayandırılması Çinə (ÇXR) Ağ Ev rəhbərinin "ağrılı nöqtəsi" olduğunu göstərib".

Oxu.Az-ın məlumatına görə, bu barədə "The New York Times"da (NYT) dərc olunan məqalədə bildirilir.

Qeyd edilir ki, rüsumların tətbiqini dayandırmaqla Tramp faktiki olaraq əsas rəqibi olan Çin lideri Si Cinpinə güzəştə gedib. ÇXR sədri, ABŞ prezidentindən fərqli olaraq, mütləq hakimiyyətlə idarə edir və qarşıya qoyulmuş məqsədlərə çatmaq üçün Çin xalqının çətinliklərə dözməsinə hazırdır. Hətta bu məqsədlər 1958-1962-ci illərdə "Böyük sıçrayış" siyasəti dövründə olduğu kimi iqtisadi və humanitar fəlakətlərə (həmin vaxt 10 milyonlarla çinli aclıqdan həlak olmuşdu) gətirib çıxarsa da…

Çində sosial şəbəkələr hazırda ABŞ ilə qarşıdurmada qətiyyətlə müqavimət göstərmək və sona qədər dayanmaq çağırışları ilə doludur. Çin XİN-in nümayəndəsi Mao Nin kimi rəsmi şəxslər ABŞ-ni bir zərbədən dağılacaq "kağız pələng"ə bənzədirlər.

Eyni zamanda, Tramp maliyyə bazarlarının, Uoll-stritin və onu dəstəkləyən milyarderlərin təzyiqini tam şəkildə görməzdən gələ bilmədiyini göstərib. Onların bir çoxu, o cümlədən İlon Mask, prezidentin tarif siyasəti ilə razılaşmadıqlarını bildiriblər. Tramp rüsumların dayandırılmasının bazarların düşməsi ilə əlaqəli olmadığını bildirsə də, NYT hesab edir ki, bu vəziyyət onun zəif nöqtəsini üzə çıxarıb.

Lakin Si Cinpinin də öz "ağrılı nöqtəsi" var - o, iqtisadi problemlərin Kommunist Partiyasının hakimiyyətinin legitimliyini təhlükə altına almasına imkan verə bilməz. ABŞ tarifləri isə Çin ixracatına - ÇXR iqtisadiyyatının əsas hərəkətverici qüvvəsinə zərbə vurur.

Beləliklə, ABŞ və Çin arasındakı ticarət müharibəsində milli maraqlar naminə öz xalqını daha uzun müddət çətinliklərə dözmək məcburiyyətində qoya bilən lider qalib gələcək. Hələ ki Si Cinpin Ağ Evdəki həmkarından daha böyük qətiyyət nümayiş etdirir.