Türkiyədə ailəsi tərəfindən öldürülən Narin Güranın son arzusu məlum oldu: Qardaşından nə istəyib?

Türkiyənin Diyarbəkir vilayətində vəhşicəsinə qətlə yetirilən səkkizyaşlı Narin Güranın böyük qardaşı Baran Güran qızcığazın son arzusundan danışıb.

Oxu.Az-ın "Türkiye" nəşrinə istinadən xəbərinə görə, Baran Güran bu barədə "Instagram" hesabında paylaşım edib.

"Ən son gün, qurban olduğum Narinim, abi, sənə bir şey deyəcəyəm söylədin. "Abi, mənə soyuq qəhvə al", - dedin. Mən də sənə alaram dedim. Gözəl bacım, sənə qurban olaram. Narinim, sənin üçün çox darıxmışam. Kəlmələr yetərsiz qalır, qurban olduğum. Səndən ötrü çox darıxmışam, Narinim", - deyə o, paylaşımda yazıb.

Xatırladaq ki, Diyarbəkirin Tavşantəpə kəndindəki Quran kursuna getdikdən sonra yoxa çıxan Narin Güranın cəsədi Egertutmaz dərəsində çuvalın içində tapılıb.

Hadisə ilə bağlı 23 şübhəli saxlanılıb və onlardan 12 nəfər həbs edilib. Həbs edilənlər arasında Narinin anası Yüksel, böyük qardaşı Enes, əmisi Salim Güran və qonşusu Nevzat Bahtiyar da olub.

Ana Yükselə, böyük qardaş Enesə və əmi Salim Gürana "İştirak halında uşağı qəsdən öldürmək" maddəsi ilə ağırlaşdırılmış ömürlük azadlıqdan məhrumetmə cəzası, Nevzat Bahtiyara isə "Cinayət dəlillərini məhv etmək, gizlətmək və ya dəyişdirmək" maddəsi üzrə 4 il 6 ay həbs cəzası verilib.

Qətldə əsas fiqurlardan biri kimi bilinən əmisi arvadı Hediye Güran və əmisinin işçisi sərbəst buraxılıblar.